إزاي مصر دخلت قائمة العشرة الكبار في العالم من حيث جذب الاستثمارات الأجنبية؟ إزاي في عز الأزمات والقلق اللي ضارب العالم.. الاقتصاد المصري بيصعد وبيحقق إنجازات تاريخية؟ وإيه الصفقة اللي قلبت الطاولة وخدت مصر من هامش الخريطة لقلب المشهد العالمي؟
في إنجاز عمره ما حصل قبل كده.. مصر لأول مرة في تاريخها تدخل قائمة أكتر 10 دول في العالم جذبًا للاستثمارات الأجنبية المباشرة سنة 2024.. وده مش مجرد تصنيف رمزي ولا شرفي.. ولكن ترتيب رسمي صادر من منظمة الأونكتاد التابعة للأمم المتحدة.
مصر جات في المركز التاسع عالميًا بـ47 مليار دولار استثمارات أجنبية مباشرة .. واتفوقت على دول زي البرازيل وأستراليا وحتى الإمارات اللي جات في المركز العاشر بـ46 مليار بس.. والمثير بقى إن مصر بقت الأولى عربيًا.. وأفريقيًا.. ومتقدمة على معظم اقتصادات أوروبا زي ألمانيا وفرنسا وإيطاليا اللي خرجوا من التوب تن تمامًا.
طب إيه اللي حصل؟ وإيه اللي خلى مصر تقفز القفزة دي فجأة؟
السبب الرئيسي.. هو صفقة رأس الحكمة .. الصفقة التاريخية اللي مصر وقعتها مع تحالف إماراتي بقيادة “القابضة ADQ” في فبراير 2024 بقيمة إجمالية 35 مليار دولار.. ودي تعتبر أكبر صفقة استثمارية منفردة في تاريخ مصر كلها.
المشروع ده مش بس جاب تمويل ضخم.. لأ .. ده كمان فتح باب لاستثمارات تانية متوقعة توصل لـ10 مليار دولار سنويًا لمدة 15 سنة ..يعني إحنا قدام ماكينة استثمار شغالة ومستمرة.. مش مجرد دفعة وقتية.
التقرير كمان أشار إن القفزة دي انعكست على القارة كلها.. القارة الأفريقية شهدت نمو استثماري ضخم بنسبة 75%.. وشمال أفريقيا تحديدًا سجلت طفرة بنسبة 277%.. كلها مدفوعة باللي حصل في مصر.
ولما نبص على المشهد العالمي نلاقي العكس تمامًا.. الاستثمارات الأجنبية في العالم كله انخفضت بنسبة 11%.. والدول المتقدمة اتأثرت بشكل كبير.. أوروبا مثلًا سجلت تراجع بنسبة 58%
ألمانيا لوحدها انخفضت فيها الاستثمارات بنسبة 89% وده بيخلي اللي حصل في مصر معجزة اقتصادية صغيرة وسط مناخ عالمي متوتر ومتراجع.
الجميل كمان إن الإنجاز ده مش هيتوقف عند رأس الحكمة.
بلومبرج كشفت إن مصر بتجهز لصفقات جديدة.. وقطر دلوقتي في مفاوضات مع مصر على استثمار سياحي ضخم بـ3.5 مليار دولار في الساحل الشمالي
منهم مليار دولار كاش عند التوقيع
وده جزء من خطة لتحويل الودائع الخليجية لمشروعات واستثمارات مباشرة.
بس برغم الصورة الوردية دي.. لازم نفتكر إن فيه تحديات الأونكتاد نفسها قالت إن 2025 ممكن يكون أصعب بسبب التوترات الجيوسياسية وتقلبات السوق.
بس اللي حصل السنة دي بيدينا مؤشر واضح إن مصر بقت على الخريطة العالمية للاستثمار وبقوة.
فلو حد بيسأل: هو فيه أمل في الاقتصاد؟ .. الإجابة ببساطة: أيوه.. والدليل 47 مليار دولار جاية من بره تقولك إن العالم بقى شايف مصر بمنظور تاني خالص.